وەزارەتی بەرگری ئەمەریکا پـێشنیارێـکی ڕووسیای ڕەتکردەوە بۆ ئەنجامدانی هێرشی هاوبەش لە دژی گروپە تێرۆرستیـیەکان لە سوریا.
جێف دەیڤس گوتەبێژی پەنتاگۆن ئەمڕۆ هەینی بە ڕۆژنامەوانانی گوت " ئێمە لە سوریا هیچ هاوکاریـیەک یان هەماهەنگیـیەک لەگەڵ ڕووسیا ناکەین."
پـێشـتر سێرگی شۆیجو وەزیری بەرگری ڕووسیا گوتی وڵاتەکەی پـێشنیاری کردووە بۆ ئەمەریکا و هاوپەیمانێتی نێودەوڵەتی لە دژی داعش کە لە 25 ی مانگی پـێنجەوە دەستبکەن بەوەی پـێکەوە هێرشی هاوبەش لە سوریا ئەنجام بدەن لە دژی گروپە تێرۆرسـتیـیەکان، لەوانە داعش و بەرەی نوسرەی باڵی قاعیدە لە سوریا.
گوتیشی دەبێت هێرشەکان ئەو گروپانەی دیکەش بگرێتەوە کە پابەندی ئاگربەستەکە نابن و هەروەها ئەو بارهەڵگرانەی لە تورکیا چەک و تەقەمەنی بۆ ناو سوریا دەگوێزنەوە.
جەختی لەوەش کرد کە لە 25 ی مانگی پـێنجەوە مافی وڵاتەکەیەتی یەک لایەنە هێرشی ئاسمانی بکاتە سەر شوێنی ڕێکخراوە تێرۆرستیـیەکان و کۆمەڵە چەکدارە نایاسایـیەکانی پابەندی ئاگربەستەکە نابن.