عەلى حسێنى: داعشەکانى کەرکوک بەرەو بێجى و شرگات رۆیشتوون

بەرپرسانى کەرکوک، دەڵێن داعش جم و جۆڵى لەدەوروبەرى کەرکوک کەم بۆتەوە و چالاکیەکانى بۆ بێجى و ناوچەى شەرگات گواستۆتەوە، ئەوەش لەکاتێکدایە هێزە عێراقیەکان رێوشوێنە ئەمنیەکانیان لەپارێزگاکە توندوتۆڵتر کردۆتەوە.

عەلى حسێنى وتەبێژى میحوەرى باکورى عێراقى حەشدى شەعبى، بەدەنگى ئەمەریکاى راگەیاند"ماوەى هەفتەیەکە داعش جم و جۆڵى کەمە لەسنورى کەرکوک، بەڵام لە سنورى شەرگات و خۆراواى بێجى جوڵەیان زۆرە."

هێزەکانى داعش لەسنورى نێوان پارێزگاکانى کەرکوک و دیالە و سەڵاحەدین گۆڕانکارى لە چالاکیەکانیان دا دەکەن، هەر جارەو فشار لەناوچەیەک دروست دەکەن و لەبەرانبەردا لەناوچەکانى تر جم و جۆڵەکانیان سنوردار دەکەن.

هەر ئەمرۆ داعش لەقەزاى دۆرى پارێزگاى سەڵاحەدین، هێرشێکى گەورەى کردۆتە سەر هێزە عێراقیەکان و بەو هۆیەوە، ژمارەیەک سەربازى عێراقى کوژراون و بریندار بوون.

ئیسماعیل حەدیدى سەرۆکى پێشوى ئەنجومەنى سیاسى عەرەبى لەکەرکوک، بەدەنگى ئەمەریکاى راگەیاند"داعش لەدەوروبەرى کەرکوک چالاکى ماوە، بەڵام چالاکیەکانى کەمە."

وتیشى"پۆلیسى فیدرالى پلانى باشى بۆ باشور و رۆژئاواى کەرکوک داناوە و پلانەکانیان تا ئێستا سەرکەوتوو بووە."

لەرۆژانى رابردووشدا هێزە عێراقیەکان لەپارێزگاى دیالە ئۆپەراسیۆنێکى گەورەیان ئەنجامدا، چونکە جم و جۆڵى داعش لەو پارێزگایە زۆربوو.

سەرچاوەیەکى ئەمنى ئاگادار لەدیالە کەداوایکرد ناوى بڵاونەکرێتەوە، بەدەنگى ئەمەریکاى راگەیاند"بەرپرسێکى دیارى داعش لەدیالە بەناوى ئەبو ئیدهام ، خۆى رادەستى هێزەکانى عێراق کردووە لەکاتى بەرێوەچوونى ئۆپەراسیۆنەکەدا."

وتیشى"هێزە عێراقیەکان بەرپرسەکەى داعشیان بۆ شارى بەعقوبەى ناوەندى پارێزگاى دیالە گواستۆتەوە."

دواى لەدەستدانى زۆربەى ناوچەکانى عێراق و کۆنترۆڵکردنەوەى لەلایەن هێزە عێراقیەکانەوە، چەکدارانى داعش شێوازى شەڕکردنیان لەشەڕى جەبهەییەوە بۆ شەڕى پارتیزانى گۆڕیوە، زۆربەى چەکدارەکانیشیان ڕوویان لە ناوچە شاخاوى و دەشتاییە دوورەکان کردووە.

ڕاپـۆرتی دڵشاد ئەنوەر